هڪ ڳوٺ ۾ هڪ ڇوڪري رهندي هئي جنهن کي اهو احساس هوندو هو ته هو اڪيلي آهي ۽ کيس ڪو به پيار ڪرڻ وارو ناهي، انهن ئي خيالن ۾ هوءَ ٻنين ڏانهن نڪري ويندي هئي ۽ اڪيلي سر پئي پور پچائيندي هئي ... هڪ ڏينهن ٻنين مان گذرندي کيس ٻه ننڍڙا ڳائڻ وارا پکي نظر آيا جي بک سبب تمام بيحال ٿي ڪري پيا هئا ... هُنَ انهن پکين کي کڻي اچي گهر ۾ پيل خالي پڃري ۾ وجهي سندن پرگهور ڪرڻ شروع ڪئي، کين پاڻي پيئارڻ ۽ چوڳو ڏيڻ لڳي ... پکين کي جڏهن ڪجهه ٻل ٿيو ته تمام گهڻي خوشيءَ مان ڳائڻ لڳا ... ڇوڪري تمام خوش ٿي ۽ انهن پکين سان کيس پيار ٿي ويو ۽ ٿورڙن ئي ڏينهن ۾ سندس سڄي پيار جو مرڪز اهي پکي ٿي پيا ... اٿندي ويهندي انهن پکين جو خيال ڪندي هئي ۽ پکي به کيس ڏسي تمام سٺيون ۽ پيار ڀريون ٻوليون ٻوليندا هئا ... هڪ ڏينهن ڀل چڪ ۾ پکين کي کاڌي کارائڻ کانپوءِ پڃري جو دروازو بند ڪرڻ وسري ويس ۽ ايتري ۾ هڪ ننڍڙو پکي اڏامي پڃري کان ٻاهر نڪري، گهر ۾ اڏرڻ لڳو، ڇوڪريءَ کي اچي پريشاني ٿي ته اهو پکي ڪٿي اڏامي نه وڃي انڪري وجهه وٺي کيس پڪڙڻ جي ڪوشش ڪرڻ لڳي، ائين ڪندي کيس وجهه ملي ويو ۽ جهڙپ ڏئي مٺ ۾ زور سان پڪڙي ورتائين ۽ جذبات ۾ ايترو ته زور سان پڪڙيائين جو ٿوري ئي دير ۾ ان ننڍڙي پکيءَ جو ساهه پرواز ڪري ويو .... ڇوڪريءَ کي تمام گهڻو ڏک ٿيو ۽ ننڍڙي پکيءَ کي ڪيتري دير تائين حسرت ۽ خوف ڀريل نظرن سان ڏسندي رهي ۽ پنهنجي جذباتي پيار تي پڇتائيندي رهي ... باقي بچيل پکيءَ ڏانهن نهار ڪيائين ته هو بي چينيءَ سان پڃري ۾ هيڏانهن کان هوڏانهن ڦيريون پائي رهيو هو ۽ ڄڻ ته ٻاهر آسمان ۾ اڏرڻ لئه وجهه وجهندو هجي، ڇوڪريءَ کي رحم اچي ويو ۽ تمام گهڻي پيار سان کيس پڃري مان ٻاهر ڪڍي اڏاري ڇڏيائين، ننڍڙي پکيءَ سندس جي مٿان ڪئي چڪر ڏنا ۽ خوشيءَ ۾ تمام گهڻو ڳائڻ لڳو ... ڇوڪري ان پکيءَ جي خوشيءَ تي خوش ٿيڻ لڳي ۽ کائنس جيڪو ٻي پکيءَ کي مارڻ وارو صدمو هو سو وسارڻ لڳي ... اوچتو اهو پکي چڪر هڻي اچي سندس ڪلهي تي ويٺو ۽ ايترو ته سهڻي ۽ پياري آواز سان ڳائڻ لڳو جو ڇوڪريءَ اهڙو پيارو گيت ڪڏهن به نه ٻڌو هو ... آزاديءَ جو گيت .... حاصل مطلب؛ پيار کي تمام جلد ختم ڪرڻ جو هڪ ئي طريقو آهي ته انکي زور سان پڪڙيو ... ۽ پيار کي هميشه قائم رکڻ جو سڀ کان سٺو طريقو آهي ته پيار کي پنهنجا کنڀ ڏيو ... آزادي ڏيو ... آزادي نعمت آهي ....
جواب: پيار ۽ آزادي سائين نثار اوهان جا لک قرب جو نصيحت آموز ڪهاڻي ونڊ ڪئي۔ بلڪل سائين آزادي کان وڌيڪ ڪا به خوشي ڪونهي۔ پر افسوس اسان معاشري جي مختلف ٻنڌڻن ۾ ٻڌجي آزادي جهڙي نعمتن کي زنجيرن سان جڪڙي ڇڏيو آهي۔ اي ڪاش اِهو تون ڄاڻين ها آزاد هوا ڇا ٿيندي آ! اي ڪاش اِهو تون ڄاڻين ها پرواز بنا پَرَ ڪئن هوندا آزاد فضا ڇا ٿيندي آ!
جواب: پيار ۽ آزادي ۔ ادا بهترين ونڊ لا مهرباني اوهان جي۔ واقعي آزادي اهڙي نعمت آهي جنهن جو ڪو مٽ ناهي هوندو الله تعالى کان دعا آهي ته اسان جي آزادي تا حيات قائم رکي ۽ غلامي جي زنجيرن کان پچا
جواب: پيار ۽ آزادي واھ سائين ننڍي ڪهاڻي ۾ وڏو سبق آهي۔ ڪهاڻي مان جيڪو سبق ملي ٿو اُهوبه اوهان لکيو آهي۔۔۔تمام بهترين ڪهاڻي شيئر ڪرڻ جي مهرباني۔ ويا اُڏي من مان اميد جا پکي من ته ڄڻ آکيرو ٿو لڳي
