مست
سينيئر رڪن
هي خبر عوامي آواز جي ڪالهوڪي ايڊيشن 12 ڊسمبر 2010ع ۾ پڙهي اٿم۔۔۔ توهان سان ونڊ ڪرڻضروري سمجهيم۔۔ هن تصوير کي ڏسڻکان پوءِته منهنجي ننڊ ئي ڦٽي وئي آهي۔۔۔ اهڙين تصويرن ۽ ظلمن کي ڏسي بابا چوندو آهي ته هاڻي سمجهه ۾ اچي ٿو ته - - - - - - - - ۔۔۔۔
شهدادڪوٽ ڀرسان وحشي مڙس ڪهاڙين سان زال جو نڪ، ڪنڌ ۽ ڳياڙي وڍي ڇڏي
لاڙڪاڻو / شهداد ڪوٽ (رپورٽ: نويد لاڙڪ/ رفيق ڀٽي) شهدادڪوٽ ڀرسان ٻوڏ دوران ذهني توازن وڃائي ويٺل شخص پنهنجي زال تي ڪهاڙي جا بيدردي سان وار ڪري نڪ، ڳياڙي ۽ ڪنڌ وڍي ڇڏيو. شهدادڪوٽ ٿاڻي جي حد ڳوٺ ڀانڙيءَ جي وانڍ ۾ ڪالهه صبح جو جوابدار بشير مگسي پنهنجي گهر اندر 25 ورهين جي نوجوان زال سهڻي مٿان ڪهاڙي جا بيدردي سان وار ڪيا، جنهن ڪري مائي سهڻي رتورت ٿي وئي، واقعي کان پوءِ جوابدار فرار ٿي ويو. واقعي ۾ مرڻينگ ٿيل مائي سهڻي کي وارثن علاج لاءِ شهدادڪوٽ جي اسپتال پهچايو، جتي طبي امداد ملڻ باوجود حالت ۾ سڌارو نه اچڻ سبب کيس لاڙڪاڻي ۾ چانڊڪا سول اسپتال جي ايمرجنسي وارڊ ۾ داخل ڪرايو ويو، جتي هوءَ ڳالهائڻ ٻولهائڻ کان لاچار ۽ بيهوشي واري حالت ۾ پيل هئي. ڊاڪٽرن موجب سندس حالت انتهائي ڳڻتي جوڳي آهي. اسپتال ۾ مائي سهڻي سان سندس ماءُ نصيبان، سس سڪينه ۽ سهرو عبدالقادر مگسي موجود هئا. صحافين سان ڳالهائيندي عبدالقادر مگسي ٻڌايو ته ڳوٺ ۾ آيل ٻوڏ سبب منهنجي پٽ بشير جو ذهني توازن خراب ٿي ويو ۽ ٻوڏ جو پاڻي داخل ٿيڻ کان پوءِ اسان بهرام ۾ سيد حاڪم شاهه جي درگاهه تي ترسيل هئاسين، جتان ڪجهه ڏينهن اڳ پاڻي سڪڻ کان پوءِ ڳوٺ آيا آهيون. واقعي وقت مان پنهنجي گهرواري سڪينه سان گڏ ٻنيءَ تي ويل هئس، خبر ناهي ته پٽ بشير ڪهڙي ڳالهه ۽ ڪهڙي اوزار سان نهن سهڻي کي زخمي ڪيو آهي. ان موقعي تي مائي نصيبان ٻڌايو ته مان ۽ بشير جي ماءُ پاڻ ۾ ڀينر آهيون ۽ ڏي وٺ جي بنياد تي منهنجي ڌيءَ سهڻي ڀاڻيجي بشير ۽ سندس ڀيڻ منهنجي پٽ کي ڏنل آهي. اسانجو ڳوٺ ڀانڙيءَ جي وانڍ کان ڪجهه پنڌ تي آهي، واقعي جو اطلاع ملڻ شرط جيئن پهتيس ته منهنجي ڌيءَ زخمي حالت ۾ هئي. هن چيو ته اسان پنهنجو پاڻ ۾ آهيون ۽ ڌيءَ کي زخمي ڪندڙ سندس مڙس بشير جو ذهني توازن به خراب آهي، ان ڪري ڪا به پوليس ڪارروائي نه ڪئي آهي. هوڏانهن مائي سهڻي جي زخمن جي چڪاس ڪندڙ نڪ، ڪن ۽ ڳلي جي ڊاڪٽر عبدالستار شيخ صحافين کي ٻڌايو ته عورت سهڻي تي تيز ڌار واري اوزار سان وار ٿيل آهن، جنهن ڪري سندس نڪ، ڳياڙي ۽ ڪنڌ چيرجي ويا آهن. جڏهن ته سندس مٿي تي به گهرا زخم موجود آهن. ڊاڪٽر انديشو ظاهر ڪيو ته ڪنڌ ۾ تيز ڌار واري اوزار سان وار ٿيڻ ڪري سندس ڪرنگهي وارو هڏو متاثر ٿيڻ سبب مائي سهڻي معذور ٿي سگهي ٿي، جڏهن ته سندس گهڻو رت وهڻ ڪري سندس حياتيءَ کي به خطرو آهي. ٻئي پاسي ڪالهه صبح سان مائي سهڻي سان پيش آيل دردناڪ واقعي جو رات دير تائين شهدادڪوٽ پوليس ڪيس داخل نه ڪيو هو ۽ نه ئي جوابدار بشير مگسي کي گرفتار ڪيو هو. مائي سهڻي چانڊڪا اسپتال ۾ بي يارو مددگار پيل آهي. هوڏانهن گهرو وزير ڊاڪٽر ذوالفقار مرزا، سڌسماءَ واري صوبائي صلاحڪار شرميلا فاروقي واقعي جو نوٽيس وٺندي ڊي پي او قمبر کان رپورٽ طلب ڪري ورتي آهي.سهڻي جو چهرو بگڙجي ويو، ڳالهائڻ کان لاچار
لاڙڪاڻو: ڳوٺ ڀانڙيءَ جي وانڍ ۾وحشي مڙس هٿان ڪهاڙين جا وار ڪري مرڻينگ ڪيل مائي سهڻي کي ٻن پٽن ۽ هڪ نياڻي جو اولاد آهي. منهن تي ڪهاڙيءَ جا وار ٿيڻ سبب جتي سندس نڪ ڪپجي ويو آهي اتي سندس چهرو به مڪمل طور تي بگڙجي ويو آهي ۽ هوءَ ڳالهائڻ ٻولهائڻ کان به لاچار بڻيل آهي. مائي سهڻي جو جوابدار مڙس بشير مگسي توڙي سندس گهر جا ٻيا ڀاتي زميندار ڊاڪٽر درشن عرف جئه جي ٻنيءَ تي ڪڙمت ڪندا آهن. مائي سهڻي کي چانڊڪا اسپتال جي حادثن واري شعبي ۾ داخل ڪرائڻ وقت وارثن سان گڏ ڊاڪٽر درشن به موجود هو.ان موقعي تي ڊاڪٽر درشن صحافين کي ٻڌايو ته بشير مگسي ڪافي وقت کان ذهني مريض هو ۽ ٻوڏ اچڻ کان پوءِ سندس حالت وڌيڪ خراب ٿي وئي. هن اهو به ٻڌايو ته بشير مگسي جو ٻوڏ کان اڳ لاڙڪاڻي جي نفسيات واري ماهر ڊاڪٽر عنايت مگسي کان علاج ڪرايو هو، پر ٻوڏ سبب هن جو وڌيڪ علاج نه ٿي سگهيو ۽ هي پاڻ ٻوڏ سبب بک، بدحالي جو شڪار ٿي ڳوٺ ڇڏي ويا ۽ هاڻي هو جڏهن واپس ڳوٺ آيا ته هي اوچتو واقعو پيش آيو آهي
