پيپلز پارٽي جي مرڪزي اڳواڻ فوزيه وهاب ڪراچي جي اسپتال ۾ لاڏاڻو ڪري وئي
ڪراچي (بيورو رپورٽ) پاڪستان پيپلز پارٽي جي اڳوڻي اطلاعات سيڪريٽري ۽ قومي اسيمبلي جي ميمبر فوزيه وهاب ڪراچي جي اسپتال ۾ علاج دوران لاڏاڻو ڪري وئي، فوزيه وهاب کي 3 هفتا اڳ او ايم آءِ اسپتال ۾ داخل ڪيو ويو هو، جتي سندس پتي جو آپريشن ٿيو، انفيڪشن ٿيڻ سبب هن جي حالت خراب ٿي وئي هئي ۽ کيس ڳڻتي جوڳي حالت ۾ آءِ سي يو ۾ منتقل ڪيو ويو هو، جتي کيس وينٽيليٽر تي رکيو ويو، ڪالهه شام جو هن جي طبيعت وڌيڪ خراب ٿي وئي ۽ هن دم ڌڻي حوالي ڪيو، پ پ جي سينيئر اڳواڻ فوزيه وهاب جو مڙهه پي اين ايس شفا جي سردخاني ۾ منتقل ڪيو ويو آهي، اڄ سومر ڏينهن ظهر جي نماز کانپوءِ ڊفينس ويو 4 جي سلطان مسجد ۾ جنازي نماز ادا ڪئي ويندي، فوزيه وهاب جي لاڏاڻي جو اطلاع ملڻ بعد سندس مائٽ، پيپلز پارٽي جا اڳواڻ اسپتال ۽ گهر پهتا، ايم ڪيو ايم جو سينيٽر بابر غوري به اسپتال پهتو.فوزيه وهاب 14 نومبر 1956ع تي ڪراچي ۾ هڪ مذهبي گهراڻي ۾ پيدا ٿي ۽ پاڪستان پيپلز پارٽي جي ٽڪيٽ تي ٻه ڀيرا عورتن جي مخصوص سيٽ تي قومي اسيمبلي جي ميمبر چونڊجي. ايوان ۾ پهتي، محترمه بينظير ڀٽو کيس انچارج پيپلز پارٽي هيومن رائيٽس سيل مقرر ڪيو. بعد هوءَ مرڻ گهڙي تائين ان عهدي تي مقرر رهئي. هن 1978ع ۾ معروف صحافي ۽ ٽي وي اينڪرپرسن وهاب صديقي سان شادي ڪئي. جنهن مان کيس 4 ٻار آهن، هن معروف ڊرامه نگار حسينه معين جي هڪ ٽي وي ڊرامي ”ڪوهر“ ۾ اداڪاري به ڪئي. 1993ع ۾ وهاب صديقي دل جي دوري سبب وفات ڪري ويو، جنهن کانپوءِ فوزيه وهاب ٻي شادي دل جي بيماري جي مشهور ڊاڪٽر اطهر حسين سان ٿي. هن 1993ع کان 1996ع تائين پاڪستان انڊسٽريل اينڊ ڪمرشل ليزن ۾ بطور مارڪيٽنگ مينجر به خدمتون سرانجام ڏنيون. انهيءَ عرصي دوران 1994ع ۾ هن کي ڪراچي ميٽرو پوليٽن ڪارپوريشن (ڪي ايم سي) جي ايڊوائيزر ڪميٽي جو ميمبر مقرر ڪيو ويو، وزيراعظم بينظير ڀٽو کيس پيپلز پارٽي (عورت ونگ سنڌ) جو سيڪريٽري اطلاعات به مقرر ڪيو ان عهدي تي 2002ع تائين رهي. 1995ع ۾ پيپلز پارٽي جي حڪومت کي هٽايو ويو ته ان کانپوءِ 1997ع ۾ عام چونڊون ٿيون پيپلز پارٽي جي ٽڪيٽ تي فوزيه وهاب اين اي 183 تان چونڊن ۾ حصو ورتو پر اتان چونڊ کٽي نه سگهي. پيپلزپارٽي لاءِ اهو مشڪل وقت هو هڪ طرف پيپلز پارٽي جي چونڊيل حڪومت ختم ڪئي وئي هئي ۽ ٻئي طرف بينظير ڀٽو ۽ ان جي ور آصف علي زرداري تي سنگين الزام لڳايا ويا ۽ انهن خلاف ڪيس داخل ڪيا ويا ان عرصي دوران پيپلز پارٽي جي قيادت جي تحفظ ۽ دفاع لاءِ هڪ وڏي مهم هلائڻ جي شروعات ڪئي وئي، جنهن ۾ فوزيه وهاب ڀرپور ڪردار ادا ڪيو، جنهن جي خدمتن عيوض بينظير ڀٽو فوزيه وهاب کي 1998ع ۾ پيپلز پارٽي هيومن رائيٽس سيل جو مرڪزي ڪوآرڊينيٽر مقرر ڪيو، فوزيه وهاب ان دوران ملڪي ۽ بين الاقوامي ميڊيا ۾ بينظير ڀٽو ۽ آصف علي زرداري جي حمايت ۾ مضمون لکيا، 2002ع جي عام چونڊن ۾ هو عورتن جي مخصوص سيٽ تان قومي اسيمبلي جي ميمبر چونڊجي آئي، 2003ع ۾ هن نيشنل ڊفينس ڪاليج جي ڪورس ۾ حصو ورتو جنهن جو مقصد سياسي اڳواڻن ۽ سلامتي ادارن جي سربراهن کي ويجهو آڻڻ هو. هن کي نيشنل ڊيموڪريٽڪ انسٽيٽيوٽ ڊسمبر 2003ع ۾ ايوارڊ سان نوازيو. جڏهن شيري رحمان وزير اطلاعات تان استيعفيٰ ڏني ته فوزيه وهاب کي 2009ع ۾ پيپلز پارٽي جي مرڪزي سيڪريٽري اطلاعات مقرر ڪيو ويو. هوءَ پيپلز پارٽي جي سينٽرل ڪميٽي جي ميمبر به رهي ست سال جلاوطني کانپوءِ جڏهن شهيد محترمه بينظير ڀٽو 18 آڪٽوبر 2007ع تي واپس ڪراچي پهتي ته ڪارساز وٽ بم حملو ڪيو ويو فوزيه وهاب حملي ۾ زخمي ٿي هئي.فوزيه وهاب جي لاڏاڻي تي پ پ جي چيئرمين بلاول ڀٽو، صدر آصف علي زرداري، وزيراعظم يوسف رضا گيلاني، مسلم ليگ (ن) جي سربراهه ميان نواز شريف، وڏي وزير سيد قائم علي شاهه، وفاقي ۽ صوبائي وزيرن، پارليامينٽ ميمبرن سميت مختلف سياسي مذهبي پارٽين جي اڳواڻن افسوس جو اظهار ڪيو آهي. وڏي وزير سيد قائم علي شاهه تعزيتي بيان ۾ فوزيه وهاب جي لاڏاڻي کي پ پ ۽ جمهوريت لاءِ وڏو نقصان قرار ڏنو آهي.
