نثارابڙو
نائب منتظم
100 سال جيئرا رهو
نوٽ؛ هڪ انگريزي ليک تان ترجمو
________________________________________
حياتي ۽ موت ته الله جي هٿ ۾ آهي پر تنهن هوندي به جيستائين جيئرا آهيون ڇونه صحت ۽ عزت سان رهون ... اچو ته چار اهڙا طريقا سکون جنهن سان ڳچ عرصو صحت ۽ عزت سان زندگي گذاري سگهجي ...
ڪجهه سال اڳ سئو سالن کان به وڌيڪ زنده ۽ صحت ۾ ڀڙ انسانن کان پڇيو ويو ته اوهين ايترا سال ڪئين گذاريا ۽ اوهانجي صحت جو راز ڪهڙو رهيو ته ڪجهه اختلافي ڳالهين سان گڏ جيڪي هڪجهڙيون ڳالهيون سڀني ٻڌايون سي هي آهن ...
1. جسماني ؛
جيئن جيئن اوهان وڏي عمر ڏانهن قدم رکندا آهيو تيئن تيئن اوهانکي جسماني ڦڙتيءَ جي ضرورت اڳي کان وڌيڪ رهندي آهي ... روزانه جسماني مشقت کي اوهان يقيني ٺاهيو، پنهنجي روزمرهه جي ڪار وهنوار کي اهڙو ته منظم ڪريو جو ننڍا ننڍا عمل به اوهانجي جسم جي ڦڙتي ۾ پنهنجو ڪردار ادا ڪن. روزاني جو گهمڻ، ڏاڪڻيون لهڻ چڙهڻ يا وري اهڙيون عادتون اختيار ڪيو جنهن سان اوهانجو جسم ڦڙت رهي، مثلن باغباني، ڪا راند روند يا وري پهاڙي علائقو هجي ته پهاڙن تي چڙهڻ يا وري سڌو هموار زراعتي علائقو هجي ته ٻنيون گهمڻ ۽ جي درياهي ۽ نهري علائقو هجي ته ترڻ وغيرهه .... مطلب ايترو ڪجهه ڪجي جو روزانه اوهانجي جسم مان پگهر وهي نڪري .... جنهن سان اوهانجي دل جي ڌڙڪن تيز ٿئي، جنهن سان اوهانجي ڦڦڙن کي تيز ۽ تڪڙن ساهن کڻڻ ۾ مدد ملي ...
2. واڌو ذهن ؛
پاڻکي کلمک، بردبار ۽ سهڻو رکڻ گهرجي، ۽ انجي اهميت انڪري آهي ته ان سان اوهين پنهنجي ڇڪتاڻ تي قابو ڪري سگهوٿا ۽ دل جي بيمارين کي روڪي سگهوٿا، اوهان پنهنجو پاڻکي شيشي ۾ هروروز ڏسو ۽ پنهنجي چهري جي تازگيءَ کي برقرار رکو ۽ شيشي جي سامهون پنهنجو پاڻ سان واعدا ڪريو ته اوهين واڌو سوچ رکندا، پاڻ کي تازو ۽ توانو رکندا ۽ پنهنجي ذهن ۾ ڪنهن به ڪاٽو قسم جي خيال کي جڳهه نه ڏيندا ...
3. سماجي؛
رشتيداريون ۽ دوستيون اوهانجي صحتمند زندگيءَ ۾ انتهائي اهم ڪردار ادا ڪن ٿيون. اوهانکي پنهنجي پئدا ڪيل سٺي ماحول مان مزو ماڻڻ گهرجي، اوهين پنهنجن انهن رشتيدارن ۽ دوستن سان گهڻو وقت گذاريو جن سان ملي اوهانکي دلي مسرت حاصل ٿيندي هجي، ڪي اهڙيون اوطاقون جت اوهان ويهي پنهنجو پاڻکي وندرائي سگهو يا وري سماجي ڀلائيءَ جي ادارن ۾ وڃي پاڻ کان گهٽ درجي يا ضرورت مند ماڻهن جي مدد ڪريو. پنهنجي هم خيال ماڻهن سان گڏ گذارڻ سان اوهانکي جيڪا خوشي ملي ٿي سا اوهانکي صحتمند رکڻ ۾ سگهاري مدد ڪري ٿي.
4. روحاني؛
پنهنجي پنهنجي مذهب جي اصولن کي مڃيندي انهن جي پوئواري ڪندي، فطرت ۽ قدرت جو مشاهدو ڪريو ۽ رب جي شڪرگذاري ڪندي، هرروز خئير ۽ ڀلائي جا عمل ڪريو، عبادت ڪريو ۽ پنهنجي ذات کي پنهنجي خلقڻهار جي حوالي ڪريو ... شڪرگذاري واري جذبي سان اوهان پاڻ ۾ ڪا ڪمي محسوس نه ڪندا ۽ اوهانجي صحت ۽ شخصيت ۾ اهڙو ته بدلاءَ ايندو جو اوهين سڪون جي ننڊ ڪندا ۽ پاڻکي اعلا درجي جو انسان سمجهندي پنهنجي عمر ۾ اضافو ڪندا رهندا ....
مطلب ته حيات رهڻ ڪا ڳالهه ناهي پر پاڻ کي زندهه رکڻ وڏي ڳالهه آهي ... پنهنجي جسم، ذهن، روح ۽ پنهنجي آس پاس جي ماحول کي زنده رکو ته اوهانجي عمر جيتري به هوندي پر صدين کان به وڏي هوندي، بلڪل ان پهاڪي جيئان ته ؛
”گدڙ جي سئو ساله زندگيءَ کان شينهن جي هڪ ڏينهن جي زندگي بهتر آهي“
