سنڌ سلامت ايڊيٽر بوڪمارڪليٽ۔۔۔۔ سنڌي ڪمپيوٽنگ ڏانهن هڪ وڌيڪ قدم

​

سنڌ سلامت جا ساٿيو اسلام عليڪم ...
واعدي مطابق اڄ توهان اڳيان سنڌ سلامت ايڊيٽر بوڪ مارڪليٽ رليز ڪجي ٿو... هن بڪ مارڪليٽ جي ذريعي ڪنهن به ويب پيج جي ڪهڙي به ٽيڪسٽ ايريا کي سنڌي ايڊيٽر ۾ تبديل ڪري سگهجي ٿو... جنهن کان پوءِ اتي سنڌي لکڻ تمام آساني سان ممڪن ٿي سگهي ٿي... منهنجي هي ڪاميابي سمورن سنڌين لاءِ رمضان جو تحفو آهي جيڪي سنڌ سلامت کانسواءِ فيس بوڪ ۽ انٽرنيٽ جي دنيا ۾ سنڌي ٻولي کي اڳتي وڌائڻ لاءِ مسلسل جستجو ۾ رڌل آهن ... ان کانسواءِ پنهنجي هي ڪاميابي آءٌ محترم سليمان وساڻ جي نانءَ ڪريان ٿو جنهن هميشه منهنجي همت افزائي ڪئي آهي.. بار بار ملاقاتن ۽ ڪالز ذريعي سنڌي ٻولي لاءِ ڪم ڪرڻ تي زور ڏيندڙ ۽ همٿائيندڙ هي دوست ڪجهه ڏينهن اڳ سنڌ سلامت انتظاميه کان ناراض رهيو آهي ... پر کيس ترت ان ڳالهه جو احساس به ٿي ويو ته ڪاوڙجي الڳ ٿيڻ بجاءِ پنهنجي اصلاحي تنقيد ۽ مشورن ذريعي ئي سنڌ سلامت جي فورم تي معيار بهتر بڻائي سگهجي ٿو...

سنڌ سلامت ايڊيٽر بوڪمارڪلٽ جي استعمال لاءِ هدايتون هتي ڪلڪ ڪري معلوم ڪري سگهجن ٿيون..

هاڻي جڏهن تقريبن سمورن آپريٽنگ سسٽم تي سنڌي جي مڪمل سپورٽ موجود آهي ... خاص طور ونڊوز 7 ۾ سنڌي انسٽال ڪرڻ اڳي کان تمام سولي آهي ... ان طرح مختلف سافٽويئرس ۾ سنڌي لکڻ به آسان ٿي ويو آهي.. پر ان باوجود اڪثر دوستن سان اهڙي صورتحال پيش ايندي جو هو اهڙي پنهنجي آفيسن ۾ اهڙي ڪمپيوٽر تي ڪم ڪري رهيا هوندا آهن جن ۾ ڪو سافٽويئر انسٽال ڪرڻ لاءِ رڪاوٽون رکيل هونديون آهن .. يا وري سائين عبدالماجد ڀرڳڙي جن جي پروگرام جي انسٽاليشن سولي هجڻ باوجود دوست انکي انسٽال نه ڪري سگهندا... اهڙي صورتحال جو حل سنڌ سلامت ايڊيٽر آهي...
سنڌ سلامت ايڊيٽر جو خيال گوگل جي ٽرانسليٽريشن بوڪمارڪلٽ تان ذهن ۾ آيو .. ۽ ان کي استعمال ڪرڻ به لڳ ڀڳ ائين ئي آهي... گوگل جي ٽرانسلٽريشن پروجيڪٽ تي به ڪم جاري آهي ۽ انشاء الله تعالي جلد ان پروجيڪٽ کي به مڪمل ڪيو ويندو.. جنهن کان پوءِ رومن سنڌي کي سنڌي اسڪرپٽ ۾ تبديل ڪرڻ پڻ آسان بڻجي ويندو..

مختلف برائوزرس تي سنڌ سلامت ايڊيٽر کي فعال ڪرڻ جو طريقو ادا عمران درويش طرفان وڊيو ۾ واضح ۽ سولي طريقي سان سمجهايو ويو آهي..​

​

​

​

سنڌ سلامت ايڊيٽر بوڪمارڪلٽ ذريعي مون فيس بوڪ وال ۽ فيس بوڪ چيٽ تي چيڪ ڪري ڏٺو ته هن کي بهترين ڪم ڪندي ڏٺم...

​

​

​

​

​

سنڌ سلامت ايڊيٽر بوڪمارڪلٽ جي ذريعي جي ميل تي ايم بي سنڌي فونٽ سان ميل ڪرڻ..

جي ميل ۽ ٻين ويب ميل سروسز ۾ وزي وگ ايڊيٽر ذريعي ميل ڪئي ويندي آهي.. ان ۾ ايم بي سنڌي ويب جي ذريعي ميل ڪرڻ جو طريقو اهو آهي ته پهريان اي ميل جي متن کي مائڪروسافٽ ورڊ ۾ لکي جتي ان تي ساڄي کان کاٻي ۽ فونٽ به اپلائي ڪري سگهجي ٿو جيئن تصوير ۾ ڏيکاريو ويو آهي

​

ان کانپوءِ ان متن جي ڪاپي ڪري جي ميل ۾ پيسٽ ڪجي ته ان جي فارميٽنگ ۽ ساڄي طرف جي سيٽنگ برقرار رهندي آهي... اصل ۾ جي ميل ۾ هڪ فيچر اڳ کان تيار ڪيل ڊرافٽ (canned responses) اڳ ئي موجود هوندو آهي جنهن جي سيٽنگ کي فعال ڪرڻ لاءِ Labs تي وڃي تصوير مطابق سيٽنگ ڪريو...

​

ان کي استعمال جو اهو آهي ته پهريان کان تيار ڪيل متن جي ميل ۾ ڊرافٽ طور محفوظ ڪري رکجي پوءِ ان ۾ سنڌ سلامت ايڊيٽر ذريعي ضروري تبديلي ڪجي ... ان طرح سان اهي دوست جيڪي سنڌي فونٽس سان گڏ سنڌي ۾ ڪنهن دوست ڏانهن ميل ڪرڻ چاهين ٿا... موڪلي سگهن ٿا... جيڪڏهن توهان جي ميل وصول ڪندڙ دوست وٽ سنڌي فونٽ موجود هوندو ته توهان جي ميل ان کي بلڪل درست ۽ سنڌي فونٽس سان ملندي... اها ساڳي ٽيڪنيڪ جي ميل کان سواءِ ٻين ميل سروسز ۾ به استعمال ڪري سگهجي ٿي...

بلاگر ڊاٽ ڪام جي بلاگز تي سنڌ سلامت ايڊيٽر بوڪمارڪليٽ جو استعمال

انٽرنيٽ تي هاڻي سنڌي بلاگز جي کوٽ پوري ٿي رهي آهي ۽ ڪافي دوست ذاتي يا اجتمائي بلاگ جوڙي رهيا آهن ... توهان ڏٺو هوندو ته اهڙن بلاگز تي ڪمينٽس ڏيڻ لاءِ مختلف ٽيڪسٽ ايرياز موجود هونديون آهن ... سنڌ سلامت ايڊيٽر بوڪمارڪلٽ کي استعمال ڪندي هاڻي توهان آساني سان اهڙن بلاگز تي پنهنجا رايا موڪلي سگهو ٿا....

برائوزر ڪمپيٽبليٽي

سنڌ سلامت ايڊيٽر بوڪمارڪلٽ اوپيرا برائوزر کان سواءِ باقي سمورن برائوزرس جهڙوڪ انٽرنيٽ ايڪسپلورر، فائر فاڪس، گوگل ڪروم ۽ سفاري تي ڪم ڪري رهيو آهي.. مون هن کي انهن برائوزر تي آزمائڻ کان سواءِ ٻين آپريٽنگ سسٽم جهڙوڪ لينڪس ۽ ميڪنٽاش تي به چيڪ ڪرايو آهي جتي اهو ڪاميابي سان استعمال ۾ آيو..


دوستو سنڌ سلامت ايڊيٽر جي تياري ۾ مون مٿي عرض ڪيو ته سنڌ سلامت بوڪمارڪلٽ جو خيال مون کي گوگل ٽرانسليٽيريشن مان ئي ذهن ۾ آيو هو .. ۽ ان سلسلي مون هيٺين ٻن اوپن سورس پروجيڪٽس مان مدد وٺڻ کان سواءِ محترم عبدالماجد ڀرڳڙي جي ويب ڪيبورڊ مان پڻ مدد ورتي..

JavaScript Graphical / Virtual Keyboard Interface
Javascript Virtual Keyboard

سنڌ سلامت ايڊيٽر بوڪمارڪليٽ کي اڪثر مان گوگل سرچ ۾ استعمال ڪندو آهيان ۽ اهو عمل مون کي ان لاءِ پسند ايندو آهي جو نتيجا سامهون اچڻ تي ڪافي بهترين ۽ فائدي واريون سائيٽون نظر مان گذرڻ ٿينديون آهن... هوئن به پهريان جي مقابلي ۾ هاڻي انٽرنيٽ تي سنڌي ٻولي تي ڪم ڪندڙ جو اضافو ٿي رهيو آهي ۽ کوڙ سارا لفظ ڳولا ۾ ميچ ٿي رهيا هوندا آهن...
دوستو سنڌ سلامت ايڊيٽر بوڪ مارڪليٽ جي باري ۾ توهان جي راءِ جو شدت سان انتظار رهندو ته جيئن ان کي وڌيڪ بهتر بڻائي سگهجي... مان توهان جي تبصرن جو منتظر رهندس...

والسلام
سنڌ سلامت ساٿ سلامت

 

جواب: سنڌ سلامت ايڊيٽر بوڪمارڪليٽ۔۔۔۔ سنڌي ڪمپيوٽنگ ڏانهن هڪ وڌيڪ قدم

رشيد شل سدائين اهڙو هجين جهڙو آهين (آمين)۔

ڏاڍو انتظار ڪرائيئي۔۔۔۔۔۔۔۔۔۔ بهرحال انتظار جو به پنهنجو مزو آهي۔ ڳولهيان ڳولهيان مه لهان ۽ من جي لوڇ ملڻ سان ماٺي ٿيئي واري ڳالهه پنهنجي جڳهه تي صحيح آهي پر هي اها شئي آهي جنهن جو انتظار به شديد هو ته ملڻ کان پوءِ استعمال جو به پنهنجو مزو آهي۔

۽ رشيد صاحب اوهان کي اهو به ٻڌائيندو هلان ته ٻلي به شينهن کي وڻ تي چڙهڻ نه سيکاريو هو پر اوهان جو اعلئ ظرف آهي ته اوهان اهڙي ڪارائتي شئي تي ڪم ڪيو، پوءِ عام ڪيو ۽ گڏوگڏ اهو به ٻڌايو ته اوهان لاءِ ان ڪم جو محرڪ ڇا هو؟ (گوگل ٽرانسليٽر)۔

ان سان اهو ٿيندو ته جيڪڏنهن ڪو دوست ان ۾ ڪا نواڻ يا وري ڪڏنهن اهڙي قسم جي پروجيڪٽ تي ڪم ڪري ته ان کي اندازو ٿيئي ته هنت ڪٿان ۽ ڪيئن وٺبي آهي۔

شل جڙيو هجين جهان ۾۔ آمين۔

 

جواب: سنڌ سلامت ايڊيٽر بوڪمارڪليٽ۔۔۔۔ سنڌي ڪمپيوٽنگ ڏانهن هڪ وڌيڪ قدم

ادا رشيد سمون سميت سمورن دوستن کي واڌايون ۔۔۔۔

هڪ انتهائي اهم قدم آهي جيڪو اسان کي سنڌي لکڻ ۾ گهڻو فائديمند ٿيندو۔ پنهنجي پياري ٻولي ۾ چيٽ ڪرڻ ۽ رومن سنڌي ۾ چيٽ ڪرڻ ۾ زمين آسمان جو فرق آهي۔ رومن سنڌي ۾ ڪيل چيٽ يا لکيل ڪمينٽس ڪڏهن ڪڏهن ته پاڻ کان به نه پڙهيا ويندا آهن۔

خير اوهان جڏهن هن پروجيڪٽ بابت ٻڌايو هو ته ان وقت ڏکيو لڳي رهيو هو پر وقت سان گڏ اوهان پاران ڪيل تجربا ۽ وري انهن تجربن تي محنت ڪرڻ سچ ته ڪو آسان ڪم ڪونه هو۔ پر اوهان پنهنجي جادوئي ڪمال سان هي سڀ ڪيو ۽ ڪامياب ويا۔ جيتوڻيڪ لکڻ وقت فونٽ ڪجهه ننڍا نطر پيا اچن جن تي اڃان مهنت جي ضرورت آهي پر پوء به سنڌي لکڻ هاڻي بلڪل آسان ٿي وئي آهي۔

اوهان جو ٿورائتو آهيان جو اوهان هي اهم ڪاميابي منهنجي نانء ڪئي آهي جيتونيڪ مان هن پروجيڪٽ ۾ اوهان کي اهم وقت تي اڪيلو ڇڏي ڏنو هو پر پوء به فورم کان هٽي به ان تي اوهان سان ڳالهه ٿيندي رهي هئي ۽ منهنجي اها خواهش هئي ته مان هجان يا نه پر هي پراجيڪٽ ضرور وقت سر اچي۔

هاڻي دوستن کي گهرجي ته هن پروجيڪٽ کي سڀني دوستن تائين پهچائن ۽ انهن جي مدد به ڪن ته ڪيئن هي بوڪمارڪليٽ ڪم ڪري ٿو۔ دوست ميل، فيسبوڪ شيئرنگ يا ايس ايم ايس ذريعي هن ٿريڊ کي عام ڪن جيئن هر سنڌي ماڻهو جيڪو ڪمپيوٽر ۽ انٽرنيٽ استعمال پيو ڪري اهو هاڻي سنڌي ۾ لکي ۽ ڪمينٽ ڪري۔

سنڌ سلامت جي سموري ساٿ خاص ڪري ادا رشيد سمون کي ٻيهر واڌايون هجن ۔۔۔۔۔۔۔۔۔

 

جواب: سنڌ سلامت ايڊيٽر بوڪمارڪليٽ۔۔۔۔ سنڌي ڪمپيوٽنگ ڏانهن هڪ وڌيڪ قدم

دوستن جي پسنديدگي جي مهرباني ۔۔۔۔۔۔
ڪافي دوستن فون جي ذريعي ۽ پيغام موڪلي پنهنجي پريشاني ۽ مونجهاري جو اظهار ڪيو ته هن ايڊيٽر کي بوڪ مارڪ ڪيئن ڪجي ان لاءِ مون پروجيڪٽ پيج تي هڪ تصوير جو اضافو ڪيو آهي ۔۔ ۽ سنڌ سلامت ايڊيٽر کي مٿي ڪري لکيو آهي ته جيئين دوست آساني سان ڊريگ ڪري برائوزر ٽولبار ۾ لنڪ کي ڊراپ ڪري سگهن ۔۔۔ تفصيل لاءِ هي تصوير ڏسو۔۔۔

​

پروجيڪٽ پيج تي وڃڻ لاءِ هتي ڪلڪ ڪريو۔۔۔

هاڻي جتي به توهان کي سنڌي لکڻي هجي اتي ڪرسر کي رکي مٿي ٽولبار تي لڳايل ”سنڌ سلامت ايڊيٽر“ تي ڪلڪ ڪريو۔۔ ۽ سنڌي لکڻ شروع ڪريو۔۔۔

ان کان علاوه ادا عمران درويش کي درخواست ڪئي اٿم ته سنڌ سلامت ايڊيٽر کي سمجهڻ لاءِ هڪ وڊيو تيار ڪن اميد آهي ته ان کي ڏسڻ کانپوءِ دوست آرام سان سنڌ سلامت ايڊيٽر سمجهي سگهندا۔۔۔

 

جواب: سنڌ سلامت ايڊيٽر بوڪمارڪليٽ۔۔۔۔ سنڌي ڪمپيوٽنگ ڏانهن هڪ وڌيڪ قدم

دوست عمران درويش سومرو جن جا لک لائق جو درخواست کي مان ڏيندي هن بوڪ مارڪليٽ کي سمجهائڻ لاءِ هڪ بهترين گرافڪس سان وڊيو تيار ڪئي آهي اميد ته سنگت هن وڊيو ڏسڻ کان پوءِ آرام سان سنڌ سلامت ايڊيٽر بوڪ مارڪليٽ کي استعمال ۾ آڻي سگهندي۔۔۔

​