مان اڪثر فرنٽ لائين جي ميزبان ڪامران شاهد جو ذڪر ڪندو آهيان۔۔۔ جو هو هميشه ڪنهن به موضوع تي پنهنجي پروگرام کي جامع پيش ڪرڻ خاطر اتان جون زميني حقيقتون معلوم ڪرڻ لاءِ پهريان ايريا ڏسڻ سان گڏ اتان جي رهندڙن سان گفتگو پڻ ڪندو آهي ته جيئن کيس ڳالهه جي درست سمجهه اچي سگهي ۔۔۔ اهو ئي سبب آهي جو پروگرام کي هر پاسي کان مڪمل طور پيش ڪندو آهي۔۔۔ رمضان ڪريم ۾ گهڻو وقت ٽي وي تي ويهي نه ٿو سگهجي پر ڪامران شاهد جي هن پروگرام مجبور ڪيو جو پروگرام لاڙڪاڻي شهر جي علائقي ڳڙهي خدا بخش يعني سنڌ تي ۽ ڀٽو خاندان تي تيار ڪيل هيو۔۔۔ سندس پروگرام ۾ لاڙڪاڻي جي شهرين جو چوڻ هو ته سموري زندگي لاءِ انهن جو ووٽ صرف ۽ صرف ڀٽو کي آهي۔۔ ڪا ٻي پارٽي انهن کي گهر ٺهرائي ڏئي، سڪول بڻائي ڏئي ۽ سڀ سهولتون به ڏئي ته به ووٽ صرف ۽ صرف ڀٽو کي ئي ڏيندا۔۔۔ ڇو ته ذوالفقار علي ڀٽو ۽ بينظير ڀٽو انهن جي لاءِ وليءَ جو درجو رکندا آهن۔۔۔ هتان جا ماڻهون زرداري حڪومت کان به بيحد خوش آهن۔۔ حالانڪه پروگرام جي اينڪر ڪامران شاهد جو چوڻ هو ته هتي اچي کيس پتو پيو ته غربت جي لڪير کان هيٺ ڪيئن زندگي گذاري ويندي آهي۔۔۔۔ ڀٽو هتان جي ماڻهن لاءِ صرف هڪ سياسي ليڊر نه هو پر هو ان کي پنهنجو روحاني پيشواه به سمجهندا آهن۔۔ ڪجهه ماڻهون ته شرڪ ڪرڻ کان به مڙندا آهن ۽ ڀٽي جي قبر تي اچي سجدا ڪندا آهن۔۔۔ هوُ ته اهو به چوندا آهن ته ”ڀٽو بي اولادن کي اولاد ڏيندو آ۔۔“ (استغفرالله) لاڙڪاڻي جا ماڻهون ڀٽو جي عقيدت ۾ ڪيتري حد تائين اڳتي نڪري چڪا آهن۔۔۔ اڙدو پروگرام جي هن هڪ ننڍي ڪلپ ۾ ڏسو ۽ ٻڌو۔۔۔۔ https://www.facebook.com/video.php?v=329141913887388 لاڙڪاڻو زوال جي هڪ داستان آهي۔۔۔ جنهن خطي جي بنجر زمين کي سنڌ درياء جون لهرون به آباد نه ڪري سگهيون۔۔۔ جتي سجدن لاءِ قبرون آهن، پوڄڻ لاءِ شهيد ۽ ووٽن لاءِ صرف ڀٽو۔۔۔ لاڙڪاڻي جا ماڻهون ۽ بي بي جي عقيدتمندن جي راءِ مطابق۔۔۔ ”بي بي جنهن کي ظالمن ماري ڇڏيو۔۔۔ جي اڃان عمر ئي مرڻ جي نه هئي۔۔ هاڻي زرداري هجي يا ڪو ٻيو سنڌي ۔۔ اسان لاءِ جتي به بي بي جو نالو ايندو ۔۔۔ اسان ووٽ صرف ان کي ئي ڏينداسين۔۔ اهو کڻي ڪهڙو به هجي۔۔ اسان سموري زندگي بلاول ڀٽو کي ووٽ ڏينداسين۔۔۔ عمران خان هڪ پراڻو گنهگار ماڻهون آ۔۔۔ اسان لاءِ ڀٽو خاندان جا سڀ ماڻهون پاڪ ۽ صاف آهن۔۔۔ چاهي اهو زرداري ئي ڇو نه هجي۔۔۔ جيڪڏهن لاڙڪاڻي ۾ ايتري ترقي نه ٿي آ ته اندرونِ پنجاب جي حالت ڪهڙو بهتر آ۔۔ نواز شريف جي حڪومت ڇا ڏنو آ۔۔۔ پهريان هتي صرف 4 ڪلاڪ بجلي ويندي هئي پر هاڻي 8 ڪلاڪ ٿي وڃي۔۔۔“ https://www.facebook.com/video.php?v=329142283887351 مٿي پروگرام جا ڪجهه ٽڪڙا ان ڪري پيش ڪيا آهن ته هن اهم پروگرام کي وقت گهٽ هجڻ ڪري به دوست ڏسي سگهن۔۔ پر جيڪي دوست وڌيڪ دلچسپي رکندا هجن۔۔۔ اهي مڪمل پروگرام ڏسڻ لاءِ هيٺين وڊيو کي پلي ڪن۔۔۔۔
ڳالهه اها آهي ته ماڻهن ۾ جڏهن ويساهه پيدا ٿيندو آ تڏهن ئي هو اهڙيون ڳالهيون ڪندا آهن۔ اوهان ڀٽائيء جي مزار تي به هلو ۽ ماڻهن کان پڇو ۔۔۔۔ اوهان کي ڪيترائي اهڙا ماڻهو ملندا جن کي لطيف جي شاعريء جي خبر ئي نه هوندي۔ هو ته لطيف کي مرشد سمجهي پنهنجون مرادون پوريون ڪرڻ لاء اچن ٿا۔ اها صرف ڀٽي جي ڳالهه ناهي پر اها سنڌ جي ماڻهن جي سوچ آهي۔
ڳالهه وري به تعليم جي اچي ٿي۔ علم سان ئي صحيح ۽ غلط عملن جي پروڙ پوندي آهي۔ شهيد ذوالفقار علي ڀٽي جي ڪيل لازوال ڪارنامن کان منهن نٿو موڙي سگهجي پر اڄ جيڪو ڪجهه اُتي ٿي رهيو آهي ان جو دنياوي يا مذهبي طور تي ڪو به جواز نه آهي۔ عظيم شخصيتن جي سندن مرڻ کا پو پوڄا ڪرڻ جي ريت اڄ جي ناهي۔ دنيا جي تاريخ جو مطالعو ڪرڻ سان خبر پوي ٿي ته آڳاٽي دور کان انسانن پنهنجي پنهنجي قوم جي وڏين هستين کي مرڻ کانپو عقيدت جي جذبي سان ياد رکڻ لا انهن جا بُت ۽ ٻيون يادگارون ٺاهي انهن جي عبادت ڪرڻ شروع ڪئي۔ شرڪ ۽ ڪفر جون ريتون رسمون انهن غلط عملن جي نتيجي ۾ ئي عام ٿين ٿيون۔ الله پاڪ سنڌ کي ۽ سنڌي ماڻهن کي پنهنجي امان ۾ رکي۔ شل اسان سڀ دين اسلام ۽ دنياوي علم سان مالامال ٿي وڃون۔ آمين۔
سنڌ جي ماڻهن جو ڀٽو لاءِ انڌو عقيدو ئي هو جو هتان مان پيپلز پارٽي ٻيهر کٽيو......اهڙي دعوى بلڪل غلط آهي ـ ٻين سياسي پارٽين جي ڪارڪردگيءَ کي ڏسو ته اوهان کي ڏندين آڱريون اچي وينديون ـ بلدياتي آرڊيننس کانپوءِ، سنڌ جي ماڻهن ٻين سياسي پارٽين ڏانهن ڏسڻ شروع ڪيو هو ۽ هنن پاڪستان مسلم ليگ فنڪشنل جي سربراهه هاڻوڪي پير پاڳاري سان ڪيتريون اميدون وابستا ڪيون پر پير صاحب، پيري مريدي جي چڪر کي ڇڏي عوام ۾ ڪونه نڪتو، سوکيس سٺي موٽ ڪونه ملي ـ مٿان هاڻوڪي پير پاڳاري جي ڀاءُ جو اهو به بيان اخبارن ۾ ڇپيو ته فنڪشنل ليگ رڳو حرن جي پارٽي آهي ـ سوال آهي ته جيڪڏهن اها رڳو حرن جي پارٽي آهي ته ٻيا ان ۾ ڇو شامل ٿين؟ جيستائين قومپرست پارٽين جو واسطو آهي ته سندن افعالن جي سڀني کي خبر آهي ـ تازو صحافي اسد چانڊئي پنهنجي اسٽيٽس تي لکيو ته هڪ وڏي قومپرست تنظيم جي ٻئي نمبر وڏي اڳواڻ ۽ سندس ڀائرن خلاف 22 ايف آءِ آر جون ڪاپيون هن سندس هڪ دوست کي ڏنيون جيڪي ڌاڙن، ڀنگ ۽ ريپ جي مقدمن جي باري ۾ آهن، سو قومپرستن کان به سنڌ جو عوام سخت مايوس آهي ـ حيدآباد جي هڪ نظرياتي قومپرست وڪيل جو ڪريڪٽر پنهنجي جاءِ تي سواليا نشان بڻيل آهي ـ 4 مارچ 1967 واري واقعي کانپوءِ جڏهن سنڌي ڇوڪريون پهريون ڀيرو سنڌ جي قومپرستيءَ واري تحريڪ ۾ شامل ٿيون ته سندس ڪرتوت انهن کي بي آبرو ڪرڻ هوندو هو ـ ڏسندي ڏسندي اهو قومپرست معمولي وڪيل مان ارب پتي بڻجي ويو ـ سو هاڻ سنڌ جو عوام ڀروسو ڪري ته ڪنهن تي ڪري؟ هاڻ ڪا اهڙي پارٽي ٺهي جنهن جي قول ۽ فعل ۾ فرق نه هجي ۽ عوام جي به خدمت ڪري ته عوام پ پ پ جي ڀيٽ ۾ ان کي ووٽ ڏيندو ـ في الحال پ پ پ، خراب ڪارڪردگيءَ وارين پارٽين مان ٿوري بهتر آهي، سو عوام ان کي ووٽ ڏئي ٿو ـ
