هيءَ عورت گلشن اقبال جي گيلاني ريلوي اسٽيشن جي ڀر ۾ ٺهيل ڪکائين گهر ۾ پنهنجي ٻچڙن سميت رهي ٿي. ڪجهه مهينا اڳ ڪراچي سرڪلر ريلوي جي بحالي لاءِ هن جي ڪکائين گهر کي غيرقانوني ڄاڻائي ڊاهڻ جو نوتيس ڏنو ويو ته مٿان وري ڪورونا وائرس اچي پکڙيو، جنهن جي نتيجي ۾ سرڪار نامدار سڀ ڪم ڇڏي سڄي سنڌ کي لاڪ ڊائون ڪرڻ جو حڪم صادر ڪيو. ايئن سنڌ جو راڄڌاني به لاڪ ڊائون جي لپيٽ ۾ اچي ويو. لاڪ دائون سبب هن عورت جو ور ۽ ٻيا مرد بيروزگار ٿي گهرن ۾ ويهي رهيا آهن. روشنين جي شهر ۾ رڌ پچاءَ لاءِ هن جپسي عورت جي ڪکائين گهر ۾ گئس جي سهولت ناهي، ان ڪري ٻن ٻچڙن کي ساڻ ڪري جهنگ مان ڪاٺيون ڪري واپس موٽي رهي آهي. هن جهڙيون انيڪ جپسي عورتون آهن، جن کي اڻڀن وارن وارا ٻارڙا به هوندا، جيڪي نفرتن جي نٽهڻ اس ۾ اڄ به بيٺل آهن.
